नेपाली विद्यार्थीले तनाव दिए, त्यसकारण घर जान सल्लाह दियौं : भारतीय कलेज केआईआईटी

काठमाडौं । भारतको कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) मा बी.टेक अध्ययनरत नेपाली विद्यार्थी प्रकृति लम्सालको शंकास्पद मृत्यु भएपछि कलेजले घटनालाई लुकाउन खोजेको आरोप लागेको छ।

प्रकृति लम्सालको रहस्यमय मृत्यु र उनले भोग्दै आएको मानसिक तथा शारीरिक दुर्व्यवहारबारे कलेज प्रशासनले आधिकारिक विज्ञप्ति जारी गर्दै भनेको छ, ‘हामीले नेपाली विद्यार्थीको मृत्यु प्रकरणमा १० घण्टासम्म शान्तिपूर्ण संवाद गर्ने प्रयास गर्यौं। तर, नेपाली विद्यार्थीहरूले कानुनी मर्यादा उल्लंघन गर्दै कलेज परिसरमा अशान्ति फैलाउने कोसिस गरे। साथै, सार्वजनिक सडक अवरुद्ध गरेर थप तनाव सिर्जना गरे।’

त्यसैगरी, कलेजले घटनाको निष्पक्ष अनुसन्धानलाई सहज बनाउने भन्दै नेपाली विद्यार्थीहरूलाई स्वदेश फर्कन सुझाव दिएको दाबी गरेको छ। ‘हामीले अनुसन्धानलाई पूर्वाग्रहबिना अगाडि बढाउन तथा सहज वातावरण बनाउनका लागि नेपाली विद्यार्थीहरूलाई तत्काल घर फर्कन सल्लाह दिएका हौं,’ विज्ञप्तिमा उल्लेख छ।

यस्तै, कलेजले शैक्षिक गतिविधिहरू चाँडै सुचारु हुने बताउँदै विद्यार्थीहरूको पठनपाठनलाई प्राथमिकता दिने आश्वासन दिएको छ। साथै, होस्टेलबाट हटाइएका विद्यार्थीहरूको निलम्बन फिर्ता लिइएको जानकारी पनि दिएको छ।

‘हाम्रो कलेजले छिट्टै पठनपाठन सुरु गर्नेछ र होस्टेलबाट निकालिएका विद्यार्थीहरूलाई पुनः फर्कन अनुमति दिइसकेको छ। यसअघि गरिएको कारबाही भने पूर्ण रूपमा शान्ति र न्याय स्थापनाका लागि लिइएको थियो,’ कलेज प्रशासनले स्पष्ट पारेको छ।