नेपाल – भारत संयुक्त सैन्य अभ्यास सम्पन्न (तस्बिरहरु)

काठमाडौँ। पुस १६ गतेदेखि रुपन्देहीको सालझण्डीस्थित नेपाली सैनिक व्याटिल स्कुलमा सुरु भएको संयुक्त अभ्यास सोमबार सम्पन्न भएको हो।

संयुक्त सैन्य अभ्यासको समापन गर्दै बलाध्यक्ष रथी प्रदीपजंग केसीले दुवै देशका फौजले प्रदर्शन गरेको व्यावसायिक दक्षता, उच्चस्तरको समर्पण र सामूहिक लगाव प्रशंसनीय रहेको बताए।

अभ्यासमा नेपाली सेनाबाट प्रमुख सेनानी निराजन कटवालको नेतृत्वमा र भारतीय सेनाबाट कर्णेल जपेन्दरपाल सिंहको नेतृत्वमा कुल ६६८ जना सैनिक सहभागी भएका थिए।

अभ्यासमा मुख्यतया विपद् व्यवस्थापन, प्रतिव्रिदोह, प्रतिआतंकवाद, जंगल युद्धकला र मानवीय सहयोगलगायतका विषयहरुमा दुई देशका सैनिकहरुले सैद्धान्तिक, व्यवहारिक र विशेष अनुभवहरुको आदानप्रदान गरिएको थियो।

यसअघि सूर्य किरणको सत्रौँ संस्करण भारतको पिथौरागढमा सम्पन्न भएको थियो। वि.सं. २०६७ सालबाट नेपाल र भारतमा वार्षिक रूपमा आलोपालो गरी अभ्यास सञ्चालन हुँदै आएको छ।